मुंबई : बस बाई बस’ हा कार्यक्रम झी मराठीवर चालू आहे. या कार्यक्रमाची सोशल मीडियावर सध्या खूप चर्चा आहे. या कार्यक्रमामध्ये विविध क्षेत्रामध्ये कर्तृत्व गाजवलेल्या महिला सहभागी होत आहेत. या कार्यक्रमाच्या पहिल्याच भागामध्ये सुप्रिया सुळे उपस्थित होत्या. नंतर उपमुख्यमंत्री देवेंद्र फडणवीस (Devendra Fadnavis) यांच्या पत्नी अमृता फडणवीस (Amruta Fadnavis) यांनी देखील ‘बस बाई बस’ या कार्यक्रमामध्ये उपस्थिती लावली. आता भाजपा नेत्या पंकजा मुंडे (Pankaja Munde) देखील या कार्यक्रमामध्ये हजेरी लावली.
यावेळी पंकजा मुंडेंनी त्यांच्या खाजगी आयुष्याबद्दल अनेक खुलासे केले. या कार्यक्रमाच्या एका प्रोमोमध्ये पंकजा मुंडे यांना त्यांच्या महाविद्यालयीन दिवसांबाबत प्रश्न देखील विचारण्यात आला. त्यावेळी त्या म्हणाल्या, “माझ्या महाविद्यालयीन दिवसांमध्ये मुंडे साहेब गृहमंत्री होते. त्यांच्याबरोबर सुरक्षारक्षक असायचे. त्याचबरोबरीने माझ्याबरोबरही तेव्हा सुरक्षारक्षक होते. त्यामुळे मला महाविद्यालयीन दिवसांची मजा घेताच आली नाही. सुरक्षारक्षक बघूनच लोक घाबरायचे. पण एकदा कोणाशी मैत्री झाली की ती शेवटपर्यंत असायची.”
नंतर त्यांना अजून एक मजेशीर प्रश्न विचारण्यात आला. त्यांना विचारण्यात आले की महाविद्यालयीन जीवनात तुम्हाला कोणी प्रपोज केलं का? यावर उत्तर देत पंकजा मुंडे म्हणाल्या, “अजिबात नाही. तो सुखद क्षण मला अनुभवताच आला नाही.” त्यांच्या कार्यक्रमाचा व्हिडीओ आता सोशल मीडियावर चांगलाच व्हायरल होत आहे.