Koregaon News । कोरेगाव तालुक्यातील ग्रामविकासात मोलाची भूमिका बजावणाऱ्या सौ. कल्पना तुकाराम चव्हाण यांची 2026 सालच्या ‘आदर्श सरपंच’ या मानाच्या पुरस्कारासाठी निवड करण्यात आली आहे. ‘महाराष्ट्र रत्न सन्मान सोहळा 2026’ या प्रतिष्ठित पुरस्कार सोहळ्यात त्यांना सन्मानित करण्यात येणार आहे. या निवडीमुळे कोरेगाव तालुक्याच्या शिरपेचात मानाचा तुरा खोवला गेला आहे.
संस्थेकडून राज्यभरातील विविध ग्रामपंचायतींचे कामकाज, विकासकामे, पारदर्शक प्रशासन आणि लोकसहभाग या निकषांवर सर्वेक्षण करण्यात आले. या सर्व बाबींमध्ये सौ. कल्पना चव्हाण यांनी उत्कृष्ट कामगिरी केल्यामुळे त्यांची ‘आदर्श सरपंच’ म्हणून निवड झाली आहे. गावातील पाणीपुरवठा, स्वच्छता मोहीम, महिला सक्षमीकरण, शाळांची उन्नती आणि विविध शासकीय योजनांची प्रभावी अंमलबजावणी यामध्ये त्यांचे विशेष योगदान राहिले आहे.
त्यांच्या नेतृत्वाखाली ग्रामपंचायतीने अनेक विकासकामांना गती दिली. गावकऱ्यांचा विश्वास संपादन करत त्यांनी पारदर्शक आणि लोकाभिमुख कारभार केला. त्यामुळे गावाच्या सर्वांगीण विकासाला चालना मिळाली आहे.
या निवडीबद्दल ग्रामस्थ आणि तालुक्यातील नागरिकांनी त्यांचे अभिनंदन केले असून, पुढील काळातही त्यांच्याकडून असेच विकासकाम सुरू राहावे, अशी अपेक्षा व्यक्त केली जात आहे. ‘महाराष्ट्र रत्न सन्मान सोहळा 2026’मध्ये होणारा हा सन्मान निश्चितच त्यांच्या कार्याची पावती ठरणार आहे.
(प्रतिनिधी रोहित बोबडे)